SIDHANG AKADEMI
SANTO ALBERTUS MAGNUS GOLONGAN A
SEMINARI MENENGAH
MERTOYUDAN
Asma : Paulus Eko Harsanto
Kelas/Absen : KPA/6
Tanggal : 19 April 2012
Tampilan : Pranata Adicara
Setting : Studio Srawung Gayeng Show
Pambuka
Dumateng Rm.
Guido minangka moderator, para pengurus sidhang, sarta para sadherek sadaya,
sugeng sonten, berkah Dalem. Kula aturaken agunging puji panuwun ing ngarsa
Dalem Gusti ingkang Maha Asih, awit saking berkah Dalem kula saged damel lan
nyawisaken tampilan kula kanthi sae.
Kula badhe
maragakaken paraga adicara. Ing kalodangan punika, kula badhe dados pranata
adicara wonten ing adicara “Srawung Gayeng Show” ingkang kirang langkung sami
kaliyan adicara talkshow ingkang
kathah wonten ing tv, contonipun Oprah
Winfrey Show, Dorce Show, lsp. Topik ingkang badhe kula rembag inggih punika
babagan kasarasan ing mangsa rendheng, amargi ing titi wanci punika kathah
tiyang ingkang sakit amargi kawontenan ingkang kirang sae ing ing mangsa rendheng
punika, upaminipun kathah lemut, virus Influenza,
lsp. Sugeng myarsakaken tampilan kula.
Isi
Srawung Gayeng Show
(Para pamirsa, kita tepangaken,
pranata adicara ingkang sampun kita mangertosi, Kang Paijo!)
Sugeng
sonten, para sadherek sadaya! Pinanggih malih kaliyan kula, Kang Paijo, wonten
ing adicara Srawung Gayeng Show. Sakderengipun, kula nyuwun pangapunten, bilih
kula dereng saged ndadosi rupa kula punika. Mugi-mugi panjenengan sadaya boten
bosen mriksani rupa kula punika saben dintenipun, inggih? Hahaha…
“Bae
de wey”, (By the way) ing sonten punika
kita badhe njlentrehake babagan kasarasan. Lha, wonten punapa tah, kok kita pirembagan
kasarasan? Ing wanci punika kita nembe ngladosi mangsa rendheng. Nah, ing
mangsa rendheng ingkang asring jawah punika, kathah sadherek kita ingkang gerah
demam berdarah, pilek, lsp. amargi kuman penyakit gampil sanget sumebar wonten
ing mangsa rendheng. Amargi punika kula ngaturi panjenengan sadaya nyrawungaken
sesarengan babagan kasarasan ing sonten punika.
Ing
sonten punika, kita gadhah tamu ingkang dados narasumber kita sadaya.
Panjenenganipun dokter ingkang ahli sanget ing bidang penyakit ing mangsa rendheng.
Kita sumanggakaken, Dr. Kuwat!
Kang Paijo : Sugeng sonten, Dr. Kuwat! Kados pundi, kabaripun?
Dr. Kuwat : Sae, sae…
Kang Paijo : Dok, kita sakpunika badhe pirembagan babagan kasarasan ing
mangsa rendheng. Sakjatosipun, punapa tah sebabipun, kok penyakit gampil sanget
sumebar ing mangsa rendheng?
Dr. Kuwat : Sakjatosipun sadaya penyakit saged sumebar ing sadaya
mangsa, gumantung penyakitipun. Nanging kathah penyakit ingkang kathahipun
sumebar wonten ing mangsa rendheng. Ing mangsa rendheng, hawanipun adem lan
teles, lembab. Blumbang-blumbang ugi kathah, amargi asring jawah. Got-got ugi
kebak banyu. Kuman penyakit dados gampil sumebar ing kahanan punika, langkung
malih demam berdarah. Lha lemutipun ‘lak dados gampil manak ing blumbang…
Kang Paijo : Sinten mawon ingkang gampil kajangkit penyakit-penyakit punika,
Dok?
Dr. Kuwat : Cetha sanget! Ingkang gampil sumebar inggih punika para
putra lan putri kita sadaya, tiyang enom ingkang tasih rentan kaliyan
penyakit-penyakit punika.
Kang Paijo : Walah! Wah, Dok, banjur punapa ingkang kedah kita ladosaken?
Dr. Kuwat : Para putra-putri punika kedah kita jagi kanthi sae.
Lare-lare punika kedah ampun dolan jawi menawi jawah, supados boten demam lan
pilek. Langkung sae menawi lare-lare punika ngginakaken sandangan anget,
upaminipun sweater. Kita ugi kedah jagi kasarasan mawi olahraga kaliyan dhahar
dhaharan sekawan saras, gangsal sampurna. Karesikan ugi kedah kita jagi,
supados kuman penyakit boten gampil sumebar. Supados demam berdarah boten
sumebar, kita kedah ngladosaken tiga M; Menguras, inggih punika nguras bak,
Menutup, inggih punika nutup bak, lan Mengubur, inggih punika mendem
kaleng-kaleng utawa plastik ingkang saged dadosaken blumbang.
Kang Paijo : Inggih, kula mangertos. Para pamirsa, kula pitados bilih
panjenengan gadhah pitakenan babagan kasarasan ingkang kita srawungaken. Sakpunika
panjenengan sadaya kula aturi kalodangan kangge ngaturaken pitakenan
panjenengan dumateng Dr. Kuwat. Mangga!
Pak Rosa :
Dok, nami kula Pak Rosa. Kula tasih boten mangertos kanthi sae, standaripun
dhaharan sekawan saras gangsal sampurna. Punapa kemawon nggih, standaripun?
Dr. Kuwat : Dhaharan sekawan saras gangsal sampurna punika dhaharan
ingkang wonten lawuh, sekul, jangan, woh lan susu. Standar sanesipun inggih punika
dhaharan kedah resik lan higienis, dipunolah kanthi mateng lan fresh from the oven, maksud kula, seger.
Mekaten, Pak Rosa, standaripun dhaharan sekawan saras gangsal sampurna.
Pak Darto : Dok, nami kula Pak Darto. Putra kula punika lho Dok,
remenipun dolan menawi jawah dumateng jawi, lan angel sanget diandani. Sakpunika
larenipun gerah pilek. Punapa ingkang kedah kula ladosaken, Pak Dokter?
Dr. Kuwat : Haha, menawi mekaten punika putranipun dicencang kemawon,
Pak Darto! Haha, guyon Pak, guyon. Panjenengan kedah mbeta larenipun dumateng
omah sakit utawa puskesmas, banjur ngrumat putra panjenengan miturut resepipun
Dokter, Utawa putranipun dibeta kemawon dumateng dalem kula. Dijamin mirah,
Pak! Langkung sae menawi putra panjenengan kathah istirahat lan ngombe wedang
putih. Mekaten, Pak Darto.
Kang Paijo : Matur nuwun, Dokter Kuwat. Kathah sanget prekawis ingkang
sampun kula sadaya tampi saking panjenengan. Mugi-mugi kula sadaya saged
ngladosaken punapa kemawon ingkang sampun panjenengan aturaken dumateng kula
sadaya.
Mekaten para pamirsa, adicara
Srawung Gayeng ing sonten punika. Pinanggih malih kaliyan kula, Kang Paijo, ing
kalodangan saklajengipun. Berkah Dalem.
Panutup
Mekaten
tampilan kula minangka pranata adicara ing sonten punika. Kula nyuwun agunging
samudra pangaksami menawi wonten kalepatan saking kula ing tampilan punika.
Kula nyuwun kritik lan saran saking panjenengan sadaya kangge mbenahi tampilan
kula ing kalodangan saklajengipun. Matur nuwun.
Refleksi
Kasarasan
punika peparing Dalem ingkang kedah kita jagi. Kula nyadari prekawis punika
saking kathahipun pengalaman kula ing babagan gerah. Kula tiyang ingkang sampun
asring gerah. Prekawis punika damel kathah bebaning gesang, dumateng kula tuwin
tiyang sanes.
Sakjatosipun,
manungsa boten badhe gerah menawi panjenenganipun saged jagi kasarasan kanthi
sae, mawi olahraga, dhahar dhaharan sekawan saras gangsal sampurna, lsp. Saking
prekawis punika kula mangertos, menawi kula dereng saged jagi kasarasan kula
kanthi sae amargi kula tasih boten midhangetaken prekawis punika kanthi
lembahing manah. Nanging, saksampunipun mlebet seminari, kula saged ngladosi
prekawis punika kanthi sae. Saking pangalaman punika, kula mangertos
pentingipun kasarasan kangge gesang kula. Mugi-mugi kula kaliyan panjenengan
sadaya saged jagi kasarasan kita sadaya kanthi sae, amargi kasarasan punika
peparing Dalem Sang Kristus ingkang kedah kita jagi. Sembah nuwun, berkah
Dalem.
No comments:
Post a Comment